Vel mætt var í jólagöngu deildarinnar sem haldin var laugardaginn 7. desember. Úti var kalt en mjög stillt og fallegt. Hundarnir skörtuðu fjölbreyttum jólapeysum og nokkrir tvífætlingar mættu einnig með jólasveinahúfur. Genginn var hringur um miðbæ Hafnarfjarðar og endað í jólaþorpinu. Við þökkum fyrir samveruna og óskum öllum gleðilegrar hátíðar.
Miðvikudagskvöldið 21. ágúst stóð deildin fyrir göngu í Paradísardal. Við fengum fínasta gönguveður og mæting var mjög góð, eða í kringum 25 hundar ásamt eigendum. Þökkum fyrir samveruna en stefnt er á næstu göngu fyrstu helgina í október. Fleiri myndir má finna á Facebooksíðu deildarinnar.
Frábær mæting var í jólagöngu deildarinnar sunnudaginn 10. desember, 33 tvífætlingar og 24 hundar. Veðrið var kalt en stillt og við gengum frá Hafnarfjarðarkirkju, tókum góðan hring og kíktum við í Hellisgerði. Endað var í jólaþorpinu þar sem við rákumst á jólasvein sem hundunum leist misvel á.
Jólaganga deildarinnar verður haldin sunnudaginn 10. desember, hittumst kl. 12 á bílastæðinu fyrir framan Hafnarfjarðarkirkju. Þetta er taumganga og við endum á því að heimsækja jólaþorpið. Gaman væri ef sem flestir gætu komið í einhverju jólalegu t.d. með jólasveinahúfur, bæði menn og hundar. Í jólaþorpinu er síðan hægt að fá heitt kakó ef kalt er í veðri. Við viljum benda á að flexitaumar eru ekki æskilegir í taumgöngur vegna slysahættu og minnum á skítapokana.
Athugið! Þetta árið fer ekki fram fyrirhugað aðventukaffi vegna framkvæmda í sal HRFÍ. Þess í stað verður haldinn nýársfagnaður 7. janúar sem verður auglýstur þegar nær dregur.
Fimmtudagskvöldið 17. ágúst gengu 15 manns og 12 hundar saman góðan hring um Paradísardal. Þetta hafði verið fremur grár og blautur dagur framan af en það rættist heldur betur úr honum og við fengum dásamlegt veður í göngunni. Þökkum öllum fyrir samveruna og hlökkum til að sjá sem flesta á næstu viðburðum.
Miðvikudagskvöldið 21. júní var haldin cavalierganga í Úlfarsárdal við Langavatn. 19 manns og 22 hundar mættu í blíðskaparveðri. Hundarnir nutu þess í botn að hlaupa um mela og móa og sumir sulluðu meira en aðrir í vatninu.
Loksins kom vorið og var mjög vel mætt í göngu deildarinnar um Elliðaárdalinn sunnudaginn 2. apríl. Samtals voru hundarnir 17 og 14 tvífætlingar fylgdu með. Fleiri voru úti að njóta veðurblíðunnar á sama tima og mættum við fullt af göngu-, hjóla- og hestafólki.
Næsta ganga er áætluð miðvikudagskvöldið 17. maí kl. 19 en þá ætlum við að ganga í kringum Reynisvatn og vonum til þess að sjá sem flesta.
Næsta ganga verður sunnudaginn 2. apríl kl. 12.
Við hittumst á bílastæðinu fyrir neðan veg á móti Dýraspítalanum í Víðidal og göngum um efri hluta Elliðaárdals. Þetta er taumganga, við viljum benda á að flexítaumar eru ekki æskilegir í taumgöngur vegna slysahættu. Munið eftir skítapokum.
Cavalierdeild HRFÍ 