Sumarganga miðvikudagskvöldið 8. júlí kl. 19

Athugið að lóðatíkur skulu bíða heima og er þá miðað við allt að 4 vikur frá fyrsta merki um lóðarí. Munum eftir kúkapokum og e.t.v. vatni fyrir hundana ef heitt verður í veðri.

Viðburður á Facebook

Vel mætt var í jólagöngu deildarinnar sem haldin var laugardaginn 7. desember. Úti var kalt en mjög stillt og fallegt. Hundarnir skörtuðu fjölbreyttum jólapeysum og nokkrir tvífætlingar mættu einnig með jólasveinahúfur. Genginn var hringur um miðbæ Hafnarfjarðar og endað í jólaþorpinu. Við þökkum fyrir samveruna og óskum öllum gleðilegrar hátíðar.

Nokkrar myndir úr göngunni má sjá hér

Frábær mæting var í jólagöngu deildarinnar sunnudaginn 10. desember, 33 tvífætlingar og 24 hundar. Veðrið var kalt en stillt og við gengum frá Hafnarfjarðarkirkju, tókum góðan hring og kíktum við í Hellisgerði. Endað var í jólaþorpinu þar sem við rákumst á jólasvein sem hundunum leist misvel á.

Fleiri myndir hér

Jólaganga deildarinnar verður haldin sunnudaginn 10. desember, hittumst kl. 12 á bílastæðinu fyrir framan Hafnarfjarðarkirkju. Þetta er taumganga og við endum á því að heimsækja jólaþorpið. Gaman væri ef sem flestir gætu komið í einhverju jólalegu t.d. með jólasveinahúfur, bæði menn og hundar. Í jólaþorpinu er síðan hægt að fá heitt kakó ef kalt er í veðri. Við viljum benda á að flexitaumar eru ekki æskilegir í taumgöngur vegna slysahættu og minnum á skítapokana.

Viðburðurinn á Facebook

Athugið! Þetta árið fer ekki fram fyrirhugað aðventukaffi vegna framkvæmda í sal HRFÍ. Þess í stað verður haldinn nýársfagnaður 7. janúar sem verður auglýstur þegar nær dregur.

Fimmtudagskvöldið 17. ágúst gengu 15 manns og 12 hundar saman góðan hring um Paradísardal. Þetta hafði verið fremur grár og blautur dagur framan af en það rættist heldur betur úr honum og við fengum dásamlegt veður í göngunni. Þökkum öllum fyrir samveruna og hlökkum til að sjá sem flesta á næstu viðburðum.

Fleiri myndir má sjá hér

Miðvikudagskvöldið 21. júní var haldin cavalierganga í Úlfarsárdal við Langavatn. 19 manns og 22 hundar mættu í blíðskaparveðri. Hundarnir nutu þess í botn að hlaupa um mela og móa og sumir sulluðu meira en aðrir í vatninu.

Fleiri myndir má sjá hér

Loksins kom vorið og var mjög vel mætt í göngu deildarinnar um Elliðaárdalinn sunnudaginn 2. apríl. Samtals voru hundarnir 17 og 14 tvífætlingar fylgdu með. Fleiri voru úti að njóta veðurblíðunnar á sama tima og mættum við fullt af göngu-, hjóla- og hestafólki.

Næsta ganga er áætluð miðvikudagskvöldið 17. maí kl. 19 en þá ætlum við að ganga í kringum Reynisvatn og vonum til þess að sjá sem flesta.