Ársfundur Cavalierdeildar HRFÍ haldinn 12. mars 2026 í húsnæði Hundaræktarfélags Íslands að Melabraut 17 í Hafnarfirði.

Árið 2025 var sannkallað afmælisár þar sem deildin var 30 ára og þá ber helst að nefna tvöfalda deildarsýningu í maí. 

Starf deildarinnar var fjölbreytt með ýmsum viðburðum. Við héldum tvöfalda sérsýningu í maí, ræktendur hittust í ræktendaspjalli og í upphafi árs var haldið vel sótt bingó til styrktar deildarinnar, en þar fór einnig fram heiðrun stigahæstu hunda og ræktenda eftir sýningaárið 2024. Ein ganga var á árinu, hún var í desember en þar var gengið í Hafnarfirði um Hellisgerði og jólaþorpið. Hvolpahittingur var haldinn tvívegis á árinu í mars og október. Fjórar heilsufarsskoðanir voru á vegum deildarinnar, tvær í Reykjavík og tvær á Akureyri. Deildin hélt yfir 20 sýningaþjálfanir eins og árið á undan. Deildin tók þátt í smáhundadögum hjá Garðheimum í mars. Deildin var með kynningarbás fyrir deildina/tegundina á októbersýningu HRFÍ. Deildin heldur úti vefslóðinni cavalier.is auk tveggja Facebook síðna þar sem birtar eru fréttir og myndir. Auk þess hélt stjórn reglulega fundi. Einnig voru sendir út hóppóstar til hvolpakaupenda, ræktenda og eigenda rakka á rakkalista. Þess má einnig geta að deildin var tvívegis á árinu með fjölmennustu skráningu á sýningum félagsins. 

Samið var við Dýrabæ um að vera styrktaraðili deildarinnar til tveggja ára, 2025 og 2026.

Í stjórn Cavalierdeildar HRFÍ sátu þetta árið:
Anna Þórðardóttir Bachmann, Guðríður Vestars, Sunna Gautadóttir og Svanhvít Sæmundsdóttir.